Facebook in corsu : perchè a Fundazione duvia arricà a so cuntribuzione ?

L'aviamu pensatu è intesu digià parechje volte : seria bè di pudè avè Facebook in corsu ! Ma bon, pè dilla franca sin'à l'apertura di Facebook in brittonu, à u principiu di u mese d'ottobre, nimu in giru à noi, ci avia pensatu in un modu seriu è determinatu... Ma postu chi i Brittoni c'eranu ghjunti, l'affare diventava pussibile...
I sgaiuffi d'a squadra d'I Kongoni  anu cuminciatu à mette a pressione cù a so pagina Facebook in corsu, è in poche simane, anu francatu i 6000 likes...
Tuttu què hè statu seguitatu cun interesse maiò da un ghjovanu corsu chì travaglia pè Facebook, Anto'Maria Battesti, chì s'hè messu in cerca d'u camminu u più cortu è efficace pè chì a richiesta sia ricevuta è trattata da l'impresa... 
E hà trovu a via... Ma ùn era ancu fatta ! Ci vulia torna à spiegà à l'impresa chì fora di u sustegnu pupulare, ci seria statu ancu un impegnu, è ghjente capace di traduce da l'inglese à u corsu.



 

E ghjè quì ch'Anto'Maria hà pensatu à noi... Cunnosce appena ciò chì face a Fundazione, postu chì l'aviamu invitatu annu pè parlà di dirittu è media suciali...in inglese !
Cunniscendu a nostra vulintà di lià radiche è apertura, è d'apre l'Università à u mondu ecunomicu è à a realità di l'imprese, s'hè dettu chì pudiamu forse ghjuvà a calcosa... è ghjè cusì ch'à u principiu di nuvembre, ci simu ritruvati in conf call trà Corti, Parigi è San Francisco pè chjarisce a metudulugia di traduzzione di Facebook in corsu.
A prima tappa era di traduce 300 parolle di u lessicu Facebook è d'entre dopu ste traduzione in linea...
Pè fà stu primu travagliu, emu adunitu una squadretta di (piuttostu) ghjovani cursofoni di l'Università, o vicini à l'Università chì parianu maneghjà corsu, inglese è rete suciali !
Ringraziu cusì à Petru Paulu de Casabianca, anzianu studiente di l'Università è capimacchja di A Piazzetta ; Bastianu Quenot, capiserviziu di u Cunsigliu di a Lingua à a CTC è anzianu studiente di Corti anc'ellu; Matteu Graziani, insegnante di lettere à l'Università, Niculau Sorba, insegnante di corsu à l'Università, Rumanu Colonna, maestru di cunferenze in sociolinguistica; Andria Fazi, maestru di cunferenze in scenze pulitiche; Laura Ferrandini ghjunta un hè tantu à a Fundazione, è poi eiu.

E eccuci un picculu mese dopu, cù u piacè tamantu d'avè aiutatu à l'apertura di Facebook in corsu.


 

Bella sicura, ghjè impurtante di pudè utilizà Facebook in corsu, ma ghjè forse assai più impurtante di capisce chì pè certe cose, l'istituzioni ùn sò più e sole risorse... Imparemu cusì à (ri)diventà maestri di i nostri usi suciali è linguistichi, è à festighjà ste vittorie simboliche assai forte !

Ma ci vole à esse chjari : quì l'affare ùn face chè principià postu chì ci sò più di 2000 infrasate à traduce in più... è stavolta emu da avè bisognu di tutti !
Se vulete partecipà, ghjè quì !

Forza !